Ciudad Jardinek LOTURA berrikuntza-proiektua abiatu du: gizarte-robotika eta adimen artifiziala estimulazio kognitiborako

CIFP Ciudad Jardín LHII ikastetxea LOTURA – Smart Cognitive Assistant berrikuntza-proiektuan lanean hasi da, CPES San Luis Lanbide Heziketa eta CPIFP Calasanz Lanbide Ikastegia ikastetxeekin elkarlanean.

Proiektuak gizarte-robotikaren eta tokiko adimen artifizialaren potentziala aztertuko du narriadura kognitiboarekin lotutako gaixotasun neurologikoak dituzten pertsonentzako estimulazio kognitiboko tailerretan, bereziki Parkinsonaren eta esklerosi anizkoitzaren kasuetan. Helburua laguntzaile robotiko bat diseinatu eta balioztatzea da, betiere profesionalen gainbegiratzepean.

LOTURAren elementu teknologiko berritzaileenetako bat Reachy Mini Wireless izango da: open source ikuspegia duen mahaigaineko robot humanoidea, pertsonaren eta robotaren arteko interakzioa esploratzeko diseinatua. Horrez gain, tokiko hizkuntza-ereduak (LLMak), Ollama bezalako soluzioak, Python bidez garatutako arkitektura modularra, hardware eta softwarearen integrazioa eta interakzioaren erregistro eta analisia landuko dira.

Proiektuak irisgarritasuna, alborapenen murrizketa, datu ez-klinikoen erabilera eta teknologiaren tokiko kontrola ere hartuko ditu kontuan, irtenbide humanizatu, trazagarri eta gainbegiratua garatzeko.

Ciudad Jardínen, proiektuak lotura zuzena du teknologia emergenteekiko dugun apustuarekin eta Adimen Artifiziala eta Big Data, Python bidezko Aplikazioen Garapena eta IT Inguruneetako Zibersegurtasuna espezializazio-ikastaroen eskaintzarekin.

Proiektua 2026-2027 ikasturtean garatuko da, eta sortutako ezagutza eta emaitzak Euskadiko LHko irakasleei, ikasleei, enpresei eta beste eragile batzuei transferitzea aurreikusten du.

Parte hartzen duten ikastetxeak: CPES San Luis Lanbide Heziketa, CIFP Ciudad Jardín LHII eta CPIFP Calasanz Lanbide Ikastegia.